އިމްސާ އަކީ، އަހަރެންގެ ހަޔާތުގެ އިމްތިޙާނުގައި ކުރިމަތިވި އެންމެ އުނދަގޫ ސުވާލެވެ. އެކަމަކު، އެންމެ ރީތި ސަފުހާ އެވެ. ދޯދިތަކުން އިމްސާގެ ފަން އިސްތަށިގަނޑު ގިރިޓީ ކުރާ ތަން ބަލަން އަހަރެން އިންނަމެވެ. ރިވެލި ބަބުޅަމުން އިރު އޮއްސޭ ތަން ބަލަން އަހަރެން އިންނަ ފަދައިންނެވެ. ވެސްޓް ޕާކުގައި ޖަހާފައިވާ ތޭރިތަކަށް އަހަރެންގެ ސަލާން ރައްދުކުރަމެވެ. އިމްސާގެ އަތުން ފިރުމާލުމުގެ ޝަރަފު އެ އަށް ލިބުނީތީ އެވެ. ކައިރީގައި ހުރި ގަނދަކޯޅި ގަހަށް އަހަރެން އިޙުތިރާމު ކުރަމެވެ. އޭނާގެ އިސްތަށިގަނޑުގައި ބީހިލުމުގެ ނަސީބު ލިބުނީތީ އެވެ. ޖެހުނު ވައިރޯޅި އަށް އަހަރެން ކުރުނީސް ކުރަމެވެ. އޭނަގެ ހަށިގަނޑުން ދުވި ގޮމަކަސްތޫރި ވަސް، އަހަންނާ ހަމައަށް އުފުލައިދިނީތީ އެވެ. އުޑުމަތި ބަނަވާ ދުވަސް ދުވަހު، ކަޅު ވިލާތަކުގެ ފަސްބައިގަ އިރު ފޮރުވާ ތަން ދެކެމެވެ. އަނދިރި ރަޖައެއް ބިންމަތީގައި ފަތުރާލާ ތަން ފެނެ އެވެ. އެހެންނަމަވެސް، ]ހަވީރުގެ ވަގުތު[ ނައިހެއް ނުދެ އެވެ. އެއީ، އިމްސާގެ ނަމުގެ މާނަ އެވެ.